Laguip ti Napalabas (By : Irenea V. Nagasangan)
Bay-am man ta innak lukiben
Pinanid ti naglabas a panawen
Ket innak ida binsa-binsaen
Nga ipalaguip tunggal maysa a gayyem.
No ti rigat ti panagbiag idi awan kapadpad na
Ta no mangisibro kam iti bado tallo wenno uppat a pulgada ti tupina iti baba
Tapno iti kasta addanto tastasen no dumakkel mangusar kenkuana
Ket tay sapatos naselselan papel sangona ta husto a pagdaklan saka nga akinkukua.
No inkam idi iti eskuela kiras bakya ti inka mangegan
Paggaak ken garikgik inosente nga adalan
Ta iti daydi a panawen awan pay adu a pagluganan
Ket magmagnakam maminpat iti uneg iti agmalem.
Adda tiempo idi a no maperdi bulong ti bakya
Agpakni igid ti kalsada, lansa ituktokmi tapno mausar bakya inkam ipagna
Ket anian a lapsat a buyaen
Babbalasitang nagbado iti balloon a napasukutan petticoat a nakagkag.
Kadaguiti met lallaki, naarmidolan a pantalon maong wenno khaki
Tapno natibket a tumakder ken nasikkil a duri
Nupay awan kuarta nga adu a binalbalonmi.
No tiempo ti ani, kada estudyante adda iggemna a kartib wenno rakem
Nawadwad a balitok a pagay ti kataltalonan inkam anien
Ngem no kunaem gayyem a bannogmi inkam narikna
Saanmi a sinamir ngem ketdi naragsak kam latta.
Idin ta dumakkel ken umado pasdek ti pagadalan
Bitbit a timba, gabion, pala ken barreta ti inka Makita
Ta kada adalan mapanda agkabra
Bantay a nakaipasdekan dakkel nga eskuwela.
Kenka napateg nga eskuwela
Bay-am ta innak met ulit-uliten
Ti samiweng kanayon minto a kankantaen
Ket ti Ingles inkam kunaen :
“Oh, dear Alma Mater with thee
Shall rest our loyalty
And forever our hearts shall say
Our Mother gave us wings.”
